ஏப்ரல் 1 முதல் புதிய வருமானவரி சட்டம் அமல்; மத்திய அரசு அறிவிப்பு

நாடு முழுவதும் வரும் ஏப்ரல் 1, முதல் புதிய வருமான வரி சட்டம் நடைமுறைக்கு வருவதாக மத்திய அரசு அறிவித்துள்ளது. 

60 ஆண்டுகள் பழமையான ‘வருமான வரிச் சட்டம் 1961’-ஐ மாற்றியமைக்கும் வகையில் கொண்டு வரப்பட்டுள்ள இந்த புதிய விதிமுறைகளுக்கு நாடாளுமன்றம் மற்றும் குடியரசு தலைவர் ஒப்புதல் அளித்துள்ளனர்.

எளிமைப்படுத்தப்பட்ட சட்டப் பிரிவுகள்

வரி செலுத்துவோர் எளிதில் புரிந்துகொள்ளும் வகையில் சட்டத்தின் மொழி நடை மாற்றப்பட்டுள்ளது.

சட்டப் பிரிவுகளின் எண்ணிக்கை 819-லிருந்து 536-ஆக குறைக்கப்பட்டுள்ளது.

சட்டத் தொகுதிகள் (Chapters) 47-லிருந்து 23-ஆக சுருக்கப்பட்டுள்ளன.

இதற்காக ‘படிவம் 33’ உட்பட 150-க்கும் மேற்பட்ட புதிய அதிகாரப்பூர்வ படிவங்கள் அறிமுகம் செய்யப்பட்டுள்ளன.

வரி விகிதங்களில் மாற்றமில்லை

புதிய சட்டத்தில் வருமான வரி உச்ச வரம்பிலோ அல்லது வரி விகிதங்களிலோ எந்த மாற்றமும் செய்யப்படவில்லை. பழைய மற்றும் புதிய வரி நடைமுறைகள் (Old & New Tax Regimes) தொடர்ந்து செயல்பாட்டில் இருக்கும்.

எச்.ஆர்.ஏ (HRA) சலுகை விரிவாக்கம்:

மாதச் சம்பளதாரர்களுக்கான வீட்டு வாடகைப் படி (HRA) வரிச் சலுகை தற்போது விரிவுபடுத்தப்பட்டுள்ளது.

50% வரி விலக்கு: ஏற்கனவே சென்னை, மும்பை, கொல்கத்தா, டெல்லி ஆகிய நகரங்களுக்கு மட்டும் இருந்த இந்தச் சலுகை, தற்போது ஐதராபாத், பெங்களூரு, புனே, அகமதாபாத் ஆகிய நகரங்களுக்கும் விரிவாக்கப்பட்டுள்ளது.

மற்ற பகுதிகளில் வசிப்பவர்களுக்கு 40% என்ற அளவு தொடரும்.

நிபந்தனை: வீட்டு உரிமையாளர் – வாடகைதாரர் இடையேயான ஒப்பந்த விவரங்களைச் சமர்ப்பிப்பது இனி கட்டாயமாகும்.

பான் (PAN) கார்டு கட்டாய வரம்பு உயர்வு:

பல்வேறு பரிவர்த்தனைகளுக்கான பான் கார்டு சமர்ப்பிக்கும் வரம்பு மாற்றியமைக்கப்பட்டுள்ளது:

சுப நிகழ்ச்சிகள்: திருமண மண்டபம் அல்லது ஹோட்டல் கட்டணங்கள் ரூ. 1 லட்சத்தைத் தாண்டினால் பான் எண் கட்டாயம் (முன்பு ரூ. 50,000).

அசையா சொத்துகள்: சொத்து வாங்குதல் அல்லது விற்பனை செய்யும் போது அதன் மதிப்பு ரூ. 20 லட்சமாக இருந்தால் பான் எண் குறிப்பிட வேண்டும் (முன்பு ரூ. 10 லட்சம்).

மத்திய அரசின் நோக்கம்: வரி தொடர்பான வழக்குகளைக் குறைக்கவும், டிஜிட்டல் பொருளாதாரத்தை முறைப்படுத்தவும், வரி செலுத்துவோர் தாமாக முன்வந்து வரி தாக்கல் செய்வதை ஊக்குவிக்கவும் இந்த ‘வருமான வரி விதிகள் 2026’ கொண்டு வரப்பட்டுள்ளதாக மத்திய நேரடி வரிகள் வாரியம் (CBDT) தெரிவித்துள்ளது.