பெண்ணை பலாத்காரம் செய்து 10 பவுன் நகை பறித்தவர், உடந்தையாக இருந்த கார் டிரைவர் ஆகியோருக்கு  தலா 7 ஆண்டு சிறை

கோவில்பட்டியை அடுத்த  பாண்டவர்மங்கலம் பகுதியைச் சேர்ந்தவர் ஜோஸ்வா இமானுவேல் (59). இவர் கடந்த 2016-ம் ஆண்டு நெல்லை மாவட்டம் தாழையூத்து பகுதியில் தன்னை கிறிஸ்தவ பாதிரியார் எனக் கூறி பிரார்த்தனை கூட்டம் நடத்தி வந்தார். அந்த கூட்டங்களுக்கு வரும் இளம்பெண்களை சிறப்பு பிரார்த்தனை என்ற பெயரில் வெளியூர்களுக்கு காரில் அழைத்துச் சென்றார்.

கடந்த 25.8.2016 அன்று 25 வயது மதிக்கத்தக்க இளம்பெண் ஒருவரை சிறப்பு பிரார்த்தனை கூட்டம் எனக் கூறி மதுரைக்கு காரில் அழைத்துச் சென்றார். அங்கு அவர் அந்த பெண்ணை பலாத்காரம் செய்து அதனை வீடியோவாக பதிவு செய்து கொண்டார். இதற்கு அவரது கார் டிரைவரான விருதுநகர் மாவட்டம் சாத்தூரை சேர்ந்த வினோத்குமார் (39) என்பவர் உடந்தையாக இருந்துள்ளார்.

மேலும் அந்த வீடியோவை சமூக வலைதளங்களில் வெளியிட்டு விடுவதாக மிரட்டி அந்த பெண்ணிடம் இருந்த 10 பவுன் தங்க நகைகளையும் பறித்துள்ளார். இதுகுறித்து அந்த இளம்பெண் 18.10.2016 அன்று தாழையூத்து போலீசில் புகார் செய்தார். போலீசார் வழக்கு பதிவு செய்து ஜோஸ்வா இமானுவேல், வினோத்குமார் ஆகியோரை கைது செய்தனர்.

இந்த வழக்கு விசாரணை நெல்லை மகிளா கோர்ட்டில் நடந்து வந்தது. நேற்று இந்த வழக்கை விசாரித்த நீதிபதி பன்னீர்செல்வம், குற்றம்சாட்டப்பட்ட ஜோஸ்வா இமானுவேல், அவருக்கு உடந்தையாக இருந்த வினோத்குமார் ஆகியோருக்கு தலா 7 ஆண்டுகள் சிறை தண்டனையும், ஜோஸ்வா இமானுவேலுக்கு ரூ.54 ஆயிரம் அபராதமும், வினோத்குமாருக்கு ரூ.3 ஆயிரம் அபராதமும் விதித்து தீர்ப்பளித்தார். இந்த வழக்கில் அரசு தரப்பில் வக்கீல் ஜெயபிரபா ஆஜரானார்.

z