கோவில்பட்டியை சேர்ந்த வங்கி மேலாளர் குடும்பத்துடன் விஷம் குடித்தார்; மனைவி பலி

தூத்துக்குடி மாவட்டம் கோவில்பட்டியை சேர்ந்தவர் முத்துராமலிங்கம்(வயது 59). இவர் திண்டுக்கல் மாவட்டம் ஒட்டன்சத்திரம் அருகில் உள்ள தங்கச்சியம்மா பட்டியில் ஒரு தேசிய மயமாக்கப்பட்ட வங்கியில் மேலாளராக பணிபுரிந்து வந்தார்.
இவரது மனைவி உமாகோமதி(55). இவர்களது மகன் சிவபிரபாகரன்(28) என்ஜினீயரிங் பட்டதாரி. முத்துராமலிங்கம் தனது குடும்பத்துடன் ஒட்டன்சத்திரம் நகராட்சி பகுதியில் வாடகை வீட்டில் வசித்து வந்தார்.
இந்த நிலையில் கடந்த ஏப்ரல் மாதம் முத்துராமலிங்கம் விருப்ப ஓய்வு பெற்றார். இவருக்கு கடன் தொல்லை இருந்ததாகவும், ஓய்வூதிய பணத்தை வாங்கி கடனை செலுத்தியதாகவும் கூறப்படுகிறது. இருந்தபோதிலும் கடன் முழுவதும் தீரவில்லை.
மேலும் இவருக்கு டயாலிசிஸ் பிரச்சினை இருந்து வந்தது. இதனால் வாழ்க்கையில் வெறுப்படைந்த முத்துராமலிங்கம் குடும்பத்துடன் தற்கொலை செய்து கொள்ள முடிவு செய்தார்.
அதன்படி உணவில் விஷம் கலந்து கணவன்-மனைவி மற்றும் மகன் ஆகிய 3 பேரும் சாப்பிட்டனர். மேலும் வீட்டில் இருந்த 2 வளர்ப்பு நாய்களுக்கும் அதனை கொடுத்தனர். இதில் ஒரு நாய் உயிரிழந்தது. மற்றொரு நாய் குரைத்துக்கொண்டே இருந்தது.
இதனால் சந்தேகமடைந்த அக்கம்பக்கத்தினர் வீட்டில் வந்து பார்த்தனர். கதவு திறக்கப்படாமல் இருந்ததால் ஒட்டன்சத்திரம் போலீசாருக்கு தகவல் தெரிவித்தனர். போலீசார் கதவை உடைத்து உள்ளே சென்று பார்த்தனர். அங்கே முத்துரமாலிங்கம், உமாகோமதி, சிவா பிரபாகரன் ஆகியோர் மயங்கிய நிலையில் கிடந்தனர். உடனடியாக அவர்களை போலீசார் மீட்டு மருத்துவமனைக்கு கொண்டு சென்றனர்.ஆனால் வழியிலேயே உமா கோமதி இறந்து போனார்.
முத்துராமலிங்கம் மற்றும் அவரது மகன் சிவபிரபாகரன் ஆகியோர் உயிருக்கு ஆபத்தான நிலையில் ஒட்டன்சத்திரம் அரசு மருத்துவமனையில் சேர்க்கப்பட்டு பின்னர் மேல்சிகிச்சைக்காக திண்டுக்கல் அரசு மருத்துவமனையில் அனுமதிக்கப்பட்டனர்.
உமாகோமதியின் உடல் பிரேத பரிசோதனைக்காக ஒட்டன்சத்திரம் அரசு மருத்துவமனைக்கு கொண்டு செல்லப்பட்டது.
முத்துராமலிங்கம் வீட்டில் இருந்த செல்போன், டைரி உள்ளிட்டவைகளை கைப்பற்றி போலீசார் விசாரணை நடத்தி வருகின்றனர். இதற்கிடையே இது பற்றிய செய்தி அறிந்து முத்துராமலிங்கத்தின் உறவினர்கள் திண்டுக்கல் விரைந்துள்ளனர்,