24 மணி நேரத்தில் 70 மில்லியன் பார்வைகளை கடந்த ‘கேம் சேஞ்சர்’ டீசர்
ஆர்.ஆர்.ஆர். திரைப்படத்தின் மிகப்பெரிய வெற்றிக்கு பிறகு ராம்சரண், இயக்குநர் சங்கர் இயக்கத்தில் ‘கேம் சேஞ்சர்’ திரைப்படத்தில் நடித்துள்ளார். அரசியல் அதிரடி திரில்லர் திரைப்படமாக இது உருவாகியுள்ளது. இயக்குநர் சங்கர் தெலுங்கு மொழியில் இயக்கும் முதல் திரைப்படம் இதுவாகும். சங்கருடன் இணைந்து இயக்குநர் கார்த்தி சுப்புராஜ் இப்படத்திற்கு கதை எழுதியுள்ளார். இதில், கியாரா அத்வானி, அஞ்சலி, எஸ்.ஜே.சூர்யா, சமுத்திரக்கனி, நாசர் போன்ற முன்னணி நடிகர்கள் நடித்துள்ளனர்.
ஸ்ரீவெங்கடேஸ்வரா கிரியேஷன்ஸ் சார்பில் தில் ராஜு தயாரிக்கும் இப்படத்திற்கு தமன் இசையமைத்துள்ளார். இத்திரைப்படம் பொங்கலை முன்னிட்டு அடுத்தாண்டு ஜனவரி 10-ம் தேதி திரையரங்குகளில் வெளியாகவுள்ளது. இப்படத்தின் டீசர் நேற்று முன்தினம் (நவம்பர்.9) வெளியான நிலையில், ரசிகர்கள் மத்தியில் நல்ல வரவேற்பை பெற்றுள்ளது.
இந்நிலையில், இப்படத்தின் டீசர் வெளியான 24 மணி நேரத்திலேயே 70 மில்லியன் பார்வைகளை கடந்துள்ளதாக படகுழு தனது எக்ஸ் வலைதள பதிவில் தெரிவித்துள்ளது.
அதிக பார்வைகளை பெற்ற டீசர்களின் வரிசையில் ‘கேம் சேஞ்சர்’ படத்தின் டீசர் 2-வது இடத்தில் உள்ளது. 83 மில்லியன் பார்வைகளை கடந்து ‘சாலர்’ படத்தின் டீசர் முதல் இடத்தை பெற்றுள்ளது குறிப்பிடத்தக்கது.
