நடிகர் கமல்ஹாசனுக்கு மு.க.ஸ்டாலின் பிறந்தநாள் வாழ்த்து

நடிகர், இயக்குநர், தயாரிப்பாளர், திரைக்கதை எழுத்தாளர், நடன இயக்குனர், பின்னணி பாடகர், பாடலாசிரியர், தொலைக்காட்சி தொகுப்பாளர், சமூக ஆர்வலர் மற்றும் அரசியல்வாதி என பல அவதாரங்களை பெற்றுள்ள கமல்ஹாசன் இன்று தனது 70-வது பிறந்தநாளை கொண்டாடுகிறார்.

1960 ஆம் ஆண்டு களத்தூர் கண்ணம்மாவில் குழந்தை நட்சத்திரமாக தனது திரையுலக வாழ்வை தொடங்கிய கமல்ஹாசன், 4 தேசிய திரைப்பட விருதுகள், 9 தமிழ்நாடு மாநில திரைப்பட விருதுகள், ஒரு ராஷ்டிரபதி விருது , 2 பிலிம்பேர் விருதுகள் மற்றும் 18 பிலிம்பேர் விருதுகள் உள்ளிட்ட பல்வேறு விருதுகளுக்கு சொந்தக்காரர். 1984-ல் கலைமாமணி விருது , 1990-ல் பத்மஸ்ரீ, 2014-ல் பத்ம பூஷன் மற்றும் 2016-ல் ஆர்டர் ஆப் ஆர்ட்ஸ் அண்ட் லெட்டர்ஸ் (செவாலியே ) விருது ஆகியவற்றை வென்றுள்ளார்.

இந்நிலையில் கமல்ஹாசனுக்கு முதலமைச்சர் மு.க.ஸ்டாலின் தனது எக்ஸ் வலைதள பதிவில் பிறந்தநாள் வாழ்த்து தெரிவித்துள்ளார்.

அதில், ‘பிறக்கின்ற புதுமைகளுக்கெல்லாம் இந்திய திரையுலகின் வாயிற்கதவுகளை திறக்கின்ற கலைஞானிக்கு பிறந்தநாள் வாழ்த்துகள்! திரைக்களம் தொடங்கி அரசியல் களம் வரை முற்போக்கு – பகுத்தறிவு கருத்துகளை பரப்புரை செய்யும் அருமை நண்பர் மக்கள் நீதி மய்யத்தின் தலைவர் கமல்ஹாசனின் தொண்டு சிறக்க விழைகிறேன்!’ என குறிப்பிட்டுள்ளார்.