கோவில்பட்டியில் அகில இந்திய ஆக்கி: போபால் அணிக்கு வெற்றி கோப்பை 

கே.ஆர்.மருத்துவம் மற்றும் கல்வி அறக்கட்டளையின் சார்பில், கே.ஆர்.கல்வி நிறுவனங்கள், இலட்சுமி அம்மாள் ஸ்போர்ட்ஸ் அகாடமியுடன் இணைந்து நடத்திய இலட்சுமி அம்மாள் நினைவுக் கோப்பைக்கான 13 -வது  அகில இந்திய ஆக்கிப் போட்டிகள் மே 24ம் தேதி தொடங்கியது.

கோவில்பட்டி செயற்கை  புல்வெளி மைதானத்தில் 10 நாட்கள் நடைபெற்ற இப்போட்டிகளில் பல்வேறு மாநிலங்களில் இருந்து 16 அணிகள் பங்கேற்று விளையாடின. இப்போட்டிகள் கால் இறுதி ஆட்டம் வரை லீக் முறையிலும், அரை இறுதி மற்றும் இறுதி போட்டிகள் அனைத்தும் நாக் அவுட் முறையிலும் நடைபெற்றது.

இன்று 2-ம் தேதி மாலை 5.மணியளவில் நடைபெற்ற மூன்றாம் மற்றும் நான்காம் இடத்திற்கான  போட்டியில் நியூ டெல்லி இந்தியன் ஆயில் கார்ப்பரேஷன் லிமிடெட் அணியும் பெங்களூரு, கனரா பேங்க் அணியும் மோதின.

இதில் 1:1 என்ற கோல் கணக்கில் இரு அணிகளும் சமன் பெற்ற நிலையில் சூட் அவுட் முறை கடைபிடிக்கப்பட்டு 

அதில் 2:0 என்ற கோல் கணக்கில் நியூ டெல்லி இந்தியன் ஆயில் கார்ப்பரேஷன் லிமிடெட் அணி வெற்றி பெற்று மூன்றாமிடம் பிடித்தது.

பாலாஜி குமார் மற்றும் முனவர் பாஷா ஆகியோர் நடுவர்களாக செயல்பட்டனர். சிறந்த ஆட்டக்காரர் விருது நியூ டெல்லி இந்தியன் ஆயில் கார்ப்பரேஷன் லிமிடெட் அணி வீரர் பங்கஜ் ரஜாவுக்கு வழங்கப்பட்டது.  

இறுதி போட்டி 

இரவு 7 மணிக்கு நடைபெற்ற இறுதி போட்டியில் போபால், நேஷனல் சென்டர் ஆப் எக்ஸலன்ஸ் அணியும் புபனேஸ்வர் நிஸ்வாஸ் அணியும் மோதின.  

ஆட்டத்தின் 2-வது நிமிடத்தில் போபால், நேஷனல் சென்டர் ஆஃப் எக்ஸலன்ஸ் அணி வீரர் அக்தர் அலி பீல்டு கோல் முறையில் ஒரு கோல் போட்டார்.

30-வது நிமிடத்தில் புபனேஸ்வர் நிஸ்வாஸ் அணி வீரர் சமிர் எக்கா பெனால்டி கார்னர் முறையில் ஒரு கோல் போட்டார்.

34 மற்றும் 44-வது நிமிடங்களில் போபால், நேஷனல் சென்டர் ஆஃப் எக்ஸலன்ஸ் அணி வீரர் பிரதான் பூவண்ணா பீல்டு கோல் முறையில் இரு கோல்கள் போட்டார்.

இறுதியில்; 3:1 என்ற கோல் கணக்கில் போபால், நேஷனல் சென்டர் ஆப் எக்ஸலன்ஸ் அணி வெற்றி பெற்று சாம்பியன் பட்டத்தை பிடித்தது.

அஸ்வனி குமார் மற்றும் சுரேஷ் குமார் ஆகியோர் நடுவர்களாக செயல்பட்டனர்.

சிறந்த ஆட்டக்காரர் விருது போபால், நேஷனல் சென்டர் ஆப் எக்ஸலன்ஸ் அணி வீரர் பிரதான் பூவண்ணாவுக்கு வழங்கப்பட்டது.

போபால், நேஷனல் சென்டர் ஆப் எக்ஸலன்ஸ் அணி வீரர்கள்  ஹெச்.எஸ்.மோஹித் சிறந்த கோல் கீப்பர்க்கான விருது, விஸ்வாஷ் சிறந்த முன்கள ஆட்டக்காரருக்கான விருது, அமந்தீப் லக்ராவுக்கு தொடர் நாயகன் விருது, பெங்களூரு-கனரா பேங்க் அணி வீரர் பரத் மஹாலிங்கப்பா-வுக்கு சிறந்த தடுப்பாளர் விருது, புபனேஸ்வர்-நிஸ்வாஸ் அணி வீரர் சுமித் ஹின்டோ-வுக்கு சிறந்த நடுகள ஆட்டக்காரருக்கான விருது,  வழங்கபட்டது.

முன்னதாக கே.ஆர்.குழுமங்கள் மற்றும் கல்வி நிறுவனங்களின் துணைத்தலைவர் கே.ஆர்.கிருஷ்ணமூர்த்தி, தாளாளர் கே.ஆர்.அருணாச்சலம் ஆகியோர் தலைமையில்  நடைபெற்ற இறுதிப் போட்டியை கோவில்பட்டி சட்ட மன்ற உறுப்பினர் கடம்பூர் செ.ராஜு, கே.ஆர்.குழுமங்கள் மற்றும் கல்வி நிறுவனங்களின் செயலாளர் சி.சங்கரநாராயணன் ஆகியோர் தொடங்கி வைத்தனர்.

விழாவில் கே.ஆர்.குழுமங்கள் மற்றும் கல்வி நிறுவனங்களின் நிர்வாக குழு உறுப்பினர் சி.ராமசாமி, நேஷனல் பொறியியல் கல்லூரி இயக்குனர் முனைவர் எஸ்.சண்முகவேல், இலட்சுமி அம்மாள் பாலிடெக்னிக் கல்லூரி முதல்வர் பேராசிரியர் எ.ராஜேஸ்வரன், கே.ஆர்.கலை மற்றும் அறிவியல் கல்லூரி முதல்வர் முனைவர் எஸ்.மதிவண்ணன்,  வழக்கறிஞர் சம்பத்குமார், ஆக்கி வீரர்கள், ஆக்கி ரசிகர்கள் என திரளானோர் கலந்து கொண்டனர். நேஷனல் பொறியியல் கல்லூரி முதல்வர் முனைவர் கே.காளிதாச முருகவேல் நிறைவு விழாவில் நன்றி கூறினார்.

போபால் அணிக்கு வெற்றிக்கோப்பை 

முதலிடம் பெற்ற போபால், நேஷனல் சென்டர் ஆப் எக்ஸலன்ஸ் அணிக்கு இலட்சுமி அம்மாள் அகில இந்திய நினைவு ஆக்கி கோப்பை மற்றும் ரூபாய் 1 லட்சம் ரொக்கப் பரிசு வழங்கப்பட்டது. இரண்டாமிடம் பெற்ற புபனேஸ்வர் நிஸ்வாஸ் அணிக்கு ரூபாய் 75,000- ரொக்கப் பரிசு, மூன்றாமிடம் பெற்ற நியூ டெல்லி இந்தியன் ஆயில் கார்ப்பரேஷன் லிமிடெட் அணிக்கு ரூபாய் 50,000 ரொக்கப் பரிசு, நான்காமிடம் பெற்ற பெங்களூரு, கனரா பேங்க் அணிக்கு ரூபாய் 30,000 ரொக்கப் பரிசு மற்றும் நினைவு கோப்பை வழங்கபட்டது.

மேலும் காலிறுதிப் போட்டியில் விளையாடிய சென்னை-அக்கவுண்டன்ட் ஜெனரல் ஆபீஸ் ரெக்கிரியேஷன் கிளப், சென்னை-இந்தியன் பேங்க், கோவில்பட்டி-எஸ்டிஏடி எக்ஸலன்ஸ்,  சென்னை-இன்கம் டேக்ஸ் ஆகிய அணிகளுக்கு ஆறுதல் பரிசாக தலா ரூபாய் 20,000 வழங்கப்பட்டது.கோவில்பட்டி-எஸ்டிஏடி எக்ஸலன்ஸ் அணி வீரர் எம்.ஆனந்தராஜுக்கு சிறந்த வளர்ந்து வரும் வீரருக்கான விருது  வழங்கப்பட்டது.