பிளஸ் 2 தேர்வு முடிவுகள் நாளை வெளியாகிறது : வாட்ஸ்அப் மூலம் அறியும் புதிய வசதி

தமிழகத்தில் பிளஸ் 2 பொதுத்தேர்வு முடிவுகள் நாளை (மே 8-ஆம் தேதி) அதிகாரப்பூர்வமாக வெளியிடப்படுகின்றன.  

இந்த ஆண்டு முதல் முறையாக வாட்ஸ்அப் மூலம் தேர்வு முடிவுகளைத் தெரிந்துகொள்ளும் வசதி அறிமுகப்படுத்தப்பட உள்ளது.

சுமார் 8.27 லட்சம் மாணவர்கள் ஆவலுடன் எதிர்பார்த்துக் காத்திருக்கும் நிலையில், தேர்வுத்துறை முடிவுகளை வெளியிடத் தயாராக உள்ளது. கடந்த மார்ச் 2 முதல் மார்ச் 26 வரை நடைபெற்ற பிளஸ் 2 பொதுத்தேர்வை தமிழகம் முழுவதும் 8 லட்சத்து 27,475 மாணவ, மாணவிகள் எழுதினர். இவர்களின் விடைத்தாள்களை மதிப்பீடு செய்யும் பணிகள் ஏப்ரல் 20-ஆம் தேதியுடன் நிறைவடைந்த நிலையில், தற்போது முடிவுகள் இறுதி செய்யப்பட்டுள்ளன.

முடிவுகளை அறியும் வழிகள்: மாணவர்கள் நாளை காலை முதல் tnresults.nic.in, results.digilocker.gov.in இணையதளங்களில் தங்கள் பதிவு எண் மற்றும் பிறந்த தேதியினைப் பதிவிட்டு முடிவுகளைத் தெரிந்துகொள்ளலாம்:

 மாணவர்கள் மற்றும் பெற்றோர்களின் வசதிக்காக இந்த ஆண்டு முதல் முறையாக வாட்ஸ்அப் மூலம் தேர்வு முடிவுகளைத் தெரிந்துகொள்ளும் வசதி அறிமுகப்படுத்தப்பட உள்ளது.

7845252525 என்ற வாட்ஸ்அப் எண்ணிற்கு ’Hi’ என்று குறுஞ்செய்தி அனுப்பினால், அந்தந்த மாணவர்களின் தேர்வு முடிவுகள் நேரடியாக அவர்களின் வாட்ஸ்அப் எண்ணிற்கே அனுப்பப்படும்.

உயர்கல்வி வாய்ப்புகள்: தேர்வு முடிவுகள் வெளியானவுடன், உயர்கல்விச் சேர்க்கைக்கான பணிகள் சூடுபிடிக்க உள்ளன. குறிப்பாக நீட் (NEET), ஜேஇஇ (JEE) மற்றும் க்யூட் (CUET) போன்ற தேசிய அளவிலான நுழைவுத் தேர்வுகளின் முடிவுகளும் விரைவில் வெளியாகவுள்ளதால், அதன் அடிப்படையில் கல்லூரிக் கலந்தாய்வுகள் மற்றும் சான்றிதழ் சரிபார்ப்புப் பணிகள் தொடங்கும் என்பது குறிப்பிடத்தக்கது.

தேர்வு முடிவுகள் வெளியாவதை முன்னிட்டு மாணவர்கள் மற்றும் கல்வி நிறுவனங்கள் மிகுந்த எதிர்பார்ப்புடன் உள்ளனர்.