முதல்வரின் பாராட்டு அமரனின் பெரும் வெற்றிக்கு அறிகுறி: கமல்ஹாசன்
Kamal Haasan
ராஜ்குமார் பெரியசாமி இயக்கத்தில் சிவகார்த்திகேயன் நடித்து திரையரங்கில் தற்போது வெளியாகியிருக்கும் படம் அமரன். ராஜ்கமல் பிலிம்ஸ் இப்படத்தை தயாரித்துள்ள நிலையில் ஜி.வி.பிரகாஷ் குமார் இசையமைத்துள்ளார். மறைந்த முன்னாள் ராணுவ வீரர் மேஜர் முகுந்தின் வாழ்க்கையை தழுவி இப்படம் உருவாகியுள்ளது.
இதில் சிவகார்த்திகேயன் மேஜர் முகுந்தாகவும், முகுந்தின் மனைவி இந்துவாக நடிகை சாய் பல்லவியும் நடித்துள்ளனர். உலகளவில் சுமார் 900-க்கும் மேற்பட்ட திரையரங்குகளில் அமரன் திரைப்படம் வெளியாகி உள்ளது. இந்த படத்தின் சிறப்பு காட்சியை முதல்-அமைச்சர் மு.க.ஸ்டாலின், நடிகர் சிவகார்த்திகேயன், துணை முதல்-அமைச்சர் உதயநிதி மற்றும் பட தயாரிப்பாளர்கள் உள்ளிட்டோர் பார்த்து மகிழ்ந்தனர்.
படத்தை பார்த்த பிறகு முதல்-அமைச்சர் மு.க.ஸ்டாலின்., சிவ கார்த்திகேயன், சாய்பல்லவி மற்றும் அமரன் படக்குழுவினர் அனைவருக்கும் என்னுடைய வாழ்த்துகள்., என்று கூறி தனது எக்ஸ் வலைதள பக்கத்தில் பாராட்டி பதிவிட்டிருந்தார்.
இந்நிலையில் ‘அமரன்’ படத்தை பாராட்டிய முதல்-அமைச்சர் மு.க.ஸ்டாலினுக்கு படத்தின் தயாரிப்பாளர் கமல்ஹாசன் நன்றி தெரிவித்துள்ளார்.
இதுதொடர்பாக அவர் தனது எக்ஸ் வலைதளத்தில் கூறியிருப்பதாவது:-
எங்களது அழைப்பை ஏற்று ‘அமரன்’ திரைப்படத்தை பார்த்து ரசித்ததோடு, படத்தையும், அதில் பங்களிப்பாற்றிய கலைஞர்களையும் மனதார பாராட்டிய தமிழ்நாடு முதல்வர், என் அன்பிற்கினிய நண்பர் மு.க.ஸ்டாலின்-க்கும், தமிழ்நாட்டின் துணை முதல்வர் என் அன்பு இளவல் உதயநிதி ஸ்டாலின்-க்கும் எங்களது மனமார்ந்த நன்றி. முதல்வரின் பாராட்டு அமரனின் பெரும் வெற்றிக்கு அறிகுறி. என தெரிவித்துள்ளார்.
