விஜய்யின் புதிய படத்தில் நடிக்கிறார் ஜெயிலர் பட நடிகர்

நடிகர் விஜய் தமிழ் சினிமாவில் ரசிகர்களால் கொண்டாடப்படும் முன்னணி நடிகர்களில் ஒருவர். கடைசியாக விஜய் நடிப்பில் வெளியான ‘தி கோட்’ திரைப்படம் சக்கைப்போடு போட்டு வசூல் ரீதியாகவும் வெற்றி பெற்றது. இதையடுத்து எச்.வினோத் இயக்கத்தில் தற்போது விஜய் நடித்து வரும் படம் ‘தளபதி 69’. இதுவே சினிமாவில் விஜய் கடைசியாக நடிக்கும் படம். படத்தில் விஜயுடன் பூஜா ஹெக்டே, பாபி தியோல் மற்றும் பலர் களமிறங்கியுள்ளனர். அனிருத் இசையமைக்கவுள்ள இந்த படத்தை கே.வி. என் நிறுவனம் தயாரிக்கிறது.

இந்த நிலையில் தளபதி 69 படத்தில் நடிக்க உள்ளதாக பிரபல கன்னட நடிகர் சிவ ராஜ்குமார் தெரிவித்துள்ளார். இவர் தமிழில் வெளிவந்த ஜெயிலர், கேப்டன் மில்லர் உள்ளிட்ட படங்களில் நடித்து கவனம் பெற்றார்.

இந்நிலையில் விஜய்யின் தளபதி 69 படத்தில் தான் நடிப்பதாக சிவ ராஜ்குமார் கூறியிருப்பது விஜய் ரசிகர் மத்தியில் உற்சாகத்தை ஏற்படுத்தியுள்ளது. அரசியல் திரில்லர் படமாக தளபதி 69 உருவாகும் என தகவல் வெளிவந்துள்ளன. இந்த படம் குறித்து கருத்து தெரிவித்திருந்த இயக்குனர் எச்.வினோத் அனைத்து தரப்பு மக்களும் ரசிக்கும் வகையில், ஜனரஞ்சகமான பொழுதுபோக்கு திரைப்படமாக தளபதி 69 அமையும் என தெரிவித்திருந்தார். இந்த படம் அடுத்த ஆண்டு அக்டோபர் மாதம் வெளியாகும் என எதிர்பார்க்கப்படுகிறது.