டெஸ்ட் கிரிக்கெட்டில் 531 விக்கெட்டுகள்: நாதன் லயனை பின்னுக்கு தள்ளிய அஸ்வின்

டெஸ்ட் கிரிக்கெட்டில் தனக்கு போட்டியாக இருக்கும் சமகால கிரிக்கெட்டர் நாதன் லயனை பின்னுக்கு தள்ளி அதிக டெஸ்ட் விக்கெட்டுகள் வீழ்த்திய பவுலராக மாறியுள்ளார் ரவிச்சந்திரன் அஸ்வின்.

இந்தியாவிற்கு சுற்றுப்பயணம் செய்துள்ள நியூசிலாந்து அணி 3 டெஸ்ட் போட்டிகள் கொண்ட தொடரில் விளையாடி வருகிறது. முதல் டெஸ்ட் போட்டியில் நியூசிலாந்து வெற்றிபெற்ற நிலையில், இரண்டாவது டெஸ்ட் போட்டியானது புனேவில் தொடங்கி நடைபெற்றுவருகிறது.

இதில் முதலில் நியூசிலாந்து அணி பேட்டிங் செய்து வருகிறது. நியூசிலாந்து அணியில் டாம் லாதம், டெவான் கான்வே மற்றும் வில் யங் என 3 பேரின் விக்கெட்டுகளையும் அஸ்வின் வீழ்த்திய நிலையில், டெஸ்ட் கிரிக்கெட்டில் வீழ்த்திய விக்கெட்டுகளின் எண்ணிக்கை 531-ஆக மாறியுள்ளது.

சமகாலத்தில் டெஸ்ட் கிரிக்கெட்டில் ஆதிக்கம் செலுத்தும் இரண்டு ஸ்பின்னர்களாக ஆஸ்திரேலியாவின் நாதன் லயன் மற்றும் ரவிச்சந்திரன் அஸ்வின் இருவரும் சிறந்து விளங்குகின்றனர். வேகப்பந்துவீச்சுக்கு பெயர் போன ஆஸ்திரேலியாவில் இருந்து நாதன் லயன் சிறந்த பந்துவீச்சாளராக ஆதிக்கம் செலுத்தும் நிலையில், அஸ்வினுக்கு முன்னதாக 500 டெஸ்ட் விக்கெட்டுகள் என்ற மைல்கல் சாதனையை நாதன் லயன் எட்டியிருந்தார்.

அவரை பின்தொடர்ந்து வந்த அஸ்வின் தற்போது அவரை பின்னுக்கு தள்ளி, அதிக டெஸ்ட் விக்கெட்டுகள் வீழ்த்திய சமகால பவுலராக மாறியுள்ளார்.

இந்நிலையில் நியூசிலாந்துக்கு எதிரான இரண்டாவது டெஸ்ட் போட்டியில் டெவான் கான்வேவை வெளியேற்றிய அஸ்வின் டெஸ்ட் கிரிக்கெட்டில் 531-வது விக்கெட்டை கைப்பற்றி, அதிக டெஸ்ட் விக்கெட்டுகள் கைப்பற்றியவர்கள் பட்டியலில் நாதன் லயனை (530) பின்னுக்கு தள்ளியுள்ளார்.

அதுமட்டுமில்லாமல் உலக டெஸ்ட் சாம்பியன்ஷிப்பில் அதிக விக்கெட்டுகள் (189) வீழ்த்திய பவுலராக மாறியிருக்கும் அஸ்வின், நாதன் லயனை (187) பின்னுக்கு தள்ளி அசத்தியுள்ளார்.

டெஸ்ட் கிரிக்கெட்டில் அதிக விக்கெட்டுகள் வீழ்த்தியவர்கள் விபரம்:- 1.முரளிதரன் – 800 விக்கெட்டுகள், 2.ஷேன் வார்னே – 708 விக்கெட்டுகள், 3.ஜேம்ஸ் ஆண்டர்சன் – 704 விக்கெட்டுகள், 4.அனில் கும்ப்ளே – 619 விக்கெட்டுகள், 5.ஸ்டூவர்ட் பிராட் – 604 விக்கெட்டுகள், 6.க்ளென் மெக்ராத் – 563 விக்கெட்டுகள், 7.ரவிச்சந்திரன் அஸ்வின் – 531 விக்கெட்டுகள், நாதன் லயன் – 530 விக்கெட்டுகள்*.